أخبار عاجلة

إيكو.. ديوان محمد فرغلي بالعامية عن هيئة الكتاب

يصدر خلال معرض القاهرة الدولي للكتاب يناير الجاري، عن الهيئة المصرية العامة للكتاب برئاسة الدكتور هيثم الحاج علي، ديوان “إيكو.. صدى من صرخة مكتومة” للشاعر محمد فرغلي، ضمن سلسلة ديوان الشعر العامي.
محمد فرغلي، شاعر مصري، ولد عام ١٩٩٠، وتخرج في كلية التجارة جامعة القاهرة، فاز ديوانه الأول «من شظايا الحرب» بجائزة أحمد فؤاد نجم، القائمة القصيرة عام ٢٠١٧، وفازت قصيدته “نقطة ومن أول يناير” بالجائزة الأولى لنموذج محاكاة جائزة نوبل٢٠١١، وصدر له ديوان “قلبي عليه مئذنة”٢٠٢٠،وديوان “طلّة من برواز” 2021.

وينشر الموقع الإخباري الرسمي لهيئة الكتاب “المعرض” قصيدة من الديوان:

أصداء مختلفة لناس صرخت من كل مكان
اختلطوا ببعض
واتبادلوا الأدوار في رجوعهم لمكان الصوت
فيه واحد في مدينة بعيدة
شُفتُه استسلم وصرخ بالآه
فرجع له صداه: تقدر تقدر!
في واحد غلبه فساد الناس
راح نادى: يا رب!
فرجع له الصدى: جواك جواك!
أصداءنا اتفقت تنقذنا
وتغير في ثوابت عُلَما،ومجرى الأحداث
يمكن ما ينطش شاب وحيد من فوق البرج
ويقرر يعزف عود أو أورج
وتْعاملُه الريح كما حَبّ لقاح طاير في الهوا
ويعامله مؤرخ بيسجل كل الأحداث من بين الناس
فيعيش حدوته وأغنيّة لِبَطَل شعبي
تسمع قصته روحك تتْرَجّ

ما اختارش الموت
واختار يكْسَح كل التعقيد اللي اتراكم جواه وحواليه
كالسفن اللي بتكسر في التلجْ
والدوشة بقت على ودنُه هَزَجْ
اختار ببساطة بإنه يعيش علشان يحتجْ
قلبه المسنود بالكلمة سند
وصداه دلوقت بيرجع عند ناياتي حزين
بإيقاع معكوس
كان عزفه صبا راجع نهاوند
رغم انه صرخ أنا عايز اموت!
ما رجعش الصدى بيقول: موت موت!
ولأول مرة في عمر الصدى يرجع غنوة:

يا ملاك الموت!
لو كنت سمعت جميع رغبات المنتحرين
كان ممكن تلمح حد حزين
محتاج طبطبة بدل الخبطات

يا ملاك الموت
أنا شايف لسّا ملاك جواك
وانك مش شبه الحدوتة
لابس إسود ومعاك منجل
شفتك مرة وانت بتخجل
قدام طلقة قتلت طفلين
أنا شفتك مرة بتبكي عشان
يوم دُقت الموت
حسيت بالشفقة على الإنسان
أنا عارف إنك زيي تمام
مش حابب تظهر بالإسود وقت الأحزان
أنا شايف جُوَّاك حدوتة
غير قَتْل الصوت
يا ملاك الموت!

تعرف على منافذ البيع